سميحة أيوب في آخر ظهور: لهذا السبب اخترت حنان مطاوع
في رسالة وداع غير مباشرة باختيارها من يقوم بتجسيد سيرتها قبل وفاتها،
اختارت الراحلة سيدة المسرح العربى النجمة حنان مطاوع ، لأنها كانت ترى فيها نفسها.
لهذا السبب اخترت حنان مطاوع
تحدثت الفنانة الراحلة سميحة أيوب في آخر تصريحات لها عن لحظة تكريمها وعن خليفتها في المسرح ومن يجسد سيرتها الذاتية. قالت أثناء استضافتها في برنامج “نجمك مع يارا”: يعني كل تكريم بيبقاله مذاقه الخاص وظروفه الخاصة وطبعًا لكل إنسان كلمة تكريم دي كلمة ليها معناها الحلو فبيبقى التكريم بالنسبة للإنسان شيء جميل يعني .
وكشفت سميحة أيوب عن سبب اختيارها الفنانة حنان مطاوع لتجسيد سيرتها الذاتية ، قائلة: “ما هو أي حد كنت هختاره كان هيبقى ليه بالذات ، وليه بالذات لأنه عنده المقومات ، لما بتطلبي حد وتقولي ده يبقى كذا لازم عنده مقاومات، فهي عندها مقومات ، فنانة حلوة وبتتقدم كل شوية بتشتغل على نفسها وواعية هي بتعمل ايه ودارسة كويس وموهوبة”.
وتابعت:
شايفة بردو أنها حنان مطاوع، ومش مسيطرة على قلبي بس دي حقيقتها، يعني الإنسان لما بتختاريه بتختاريه لأن جواه حاجات كتير. وأكتر عمل أعتز بيه هو مسلسل “الضوء الشارد” ، وكنت بتعاطف مع كل إنسان بيعمل شغله حلو”.
وعن رأيها في مصطلح السينما النظيفة ، أوضحت: “مفيش حاجة اسمها عكس النظيف وانتي بتطلعي الحياة، والفن ما هو إلا دراسة للحياة”.
واستكملت: أكتر موضوع لازم نتكلم فيه هو الإنسانيات والضمير والصدق، افتقدناهم الفترة الأخيرة إلى حد ما .
وعن رأيها في السوشيال ميديا، أشارت: مش بتابع السوشيال ميديا ومبصدقهاش، وأكتر حاجة نفسي أقدمها الفترة الجاية أي حاجة تنفع للإنسان، زي الأخلاقيات والتعاملات والضمير .
وعن سبب اختفائها عن السينما: سبب اختفائي عن السينما مدام مفيش حاجة مناسبة ليا مش هعملها ، وكل واحد بيعمل دور حلو مفيش حد أكبر واحد ولا أعظم واحد كل واحد في دوره بيعمله حلو.
وعن أكثر نجم شاب نجح في المسرح: الحقيقة مقدرش أقول أشخاص يعني متسألنيش مين وفين والمميز والغير مميز كل واحد بيعمل حاجة بيبقى مميز فيها مفيش حد مطلق يعني.
وعن اعتزالها: لما أحس إن أنا مش قادرة أعمل حاجة هاخد القرار ده .
والاختلاف في المسرح كل وقت وله أذان منقدرش نقول ارجع يازمان، والاختلاف في المحتوى وفي وجهات النظر وحاجات كتير ، محضرتش مسرحيات الفترة الأخيرة ومسرح مصر ده اسكتشات وهي ناجحة مع الناس لأنها أخدت الناس على المسرح ورجلهم راحت على المسرح وده شيء جميل جدا لكن هو اسكتشات مش مسرح بمعنى الكلمة بس له الفضل أنه عمل رواج .
وخالد جلال ظاهرة فنية جميلة وأفاد كتير من الشباب وطلع جيل جديد وبعدين مش في مصر بس في العالم العربي .
