الواد زعبلا النبطشى

 

 

 

 

بقلم الشاعرة: هالة القصاص

 

الواد زعبلا النبطشى
اللى يولع أيتها فرح ولا يتصابشى
خبرة سنين يا عم
اللمبة فى إيده تولع ولا تتقفلشى
من غير سلك كهربا وبعون الله ولا يكهربشى
يعنى ساحر فى سيرك
ولا إيه ولا أنا ما بفهمشى
يا عم بقولك نبطشى
يقدم الرقاصة والهجاصة ويقول اللى ما يتقالشى
واد على كيف كيفك
فى الأونطة ماحصلشي يخلى السكر مر
والمرارة فيه ما تبانشى
والحلو ع المداق
بس كل وما تشبعشى
ويقول ع الصبية جلدة
والعجوزة قردة ولا يتحاسبشى
ويقول مساء الخير الصبح
وصباح الخير بالليل و لا يتعاتبشى
مش بقولك نبطشى
سكران بيكلم سكارى
واهو كله يمشى الفرح شطب. والنهار شقشق
والكلام كأنه ما تقالشى
ياااااه ده بينه حلم
أصلى كنت بحلم إنى أكون الواد زعبلا النبطشى